Հ.Յ.Դ. 125-րդ Ամեակ

Շաբաթ՝ 28 Նոյեմբեր 2015-ին Լոնտոնահայ գաղութը անմոռանալի երեկոյ մը ապրեցաւ։

Հայ Յեղափոխական Դաշնակցութեան 125 ամեակի ոգեկոչման նուիրուած տօնակատարութիւնը, նախաձեռնութեամբ ՀՅԴ Անգլիոյ կոմիտէութեան տեղի ունեցաւ «Ealing Town Hall»–ի սրահէն ներս Լոնտոնահայ գաղութի հոծ բազմութեան
մասնակցութեամբ։

«Մեր Հայրենիք» և «Մշակ Բանուոր» քայլերգներուն ունկնդրելէ ետք խօսք առաւ օրուայ հանդիսավար՝ ընկերուհի Արմինէ Գասպարեան անդրաեառնալով Հայ Յեղափոխական
Դաշնակցութեան մէկ և կէս դարուայ շարունակական աշխատանքին, հետապնդելով հայ ժողովուրդի քաղաքական շահերը, ինչպէս նաեւ պաշտպանելով անոր նիւթական հոգեւոր, մշակութային և մարդկային իրաւունքներն ու յառաջխաղացութիւնը։

Ապա բեմ հրաւիրուեցաւ ՀՅԴ Հայաստանի Գերագոյն Մարմնի անդամ՝ ընկերուհի Լիլիթ Գալստեան փոխանցելու օրուայ պատգամը։ Ան նշեց Դաշնակցութեան ծանրակշիռ դերը իր ծնած օրէն ի վեր, թէ հայրենիքէն ներս և թէ սփիւռքի մէջ, մանաւանդ անդրադառնալով Հայաստանի քաղաքական վերջին դէպքերուն ուր Դաշնակցութեան առաջարկը սահմանադրական բարեփոխումներու նկատմամբ սկզբունքային հիմքերէ բխած է
ժողովուրդին տալով քաղաքական կամքի ազատութիւն։ Շնորհաւորանքի և օրհնանքի իր խօսքը ուղղեց թեմիս առաջնորդ Հովակիմ Եպիսկոպոս Մանուկեան, անդրադառնալով Դաշնակցութեան ձեռք բերած յաջողութիւններուն որոնք կերտեցին մեր ժողովուրդի քաղաքական իրավիճակը պատմութեան ընթացքին։

Երեկոն շարունակուեցաւ գեղարուեստական բաժնով, հայրենիքէն մասնաւոր հրաւիրուած երէք արուեստագետներու մասնակցութեամբ։ Անոնցմէ առաջինը՝ Ազատամարտի երգիչ Մկրտիչ Մկրտչյան ազգային-յեղափոխական երգերով
հրապուրեց բազմութիւնը։ Անոր յաջորդեցին ՀՀ վաստակաւոր երգչուհի՝ Լէյլա Սարիբեկյան և ժողովրդական երգիչ՝ Արսեն Գրիգորյան որոնց կ’ընկերակցէր Լոնտոնաբնակ Ախթամար պարախումբը, ստեղծելով խանդավառ և ոգեւորիչ մթնոլորտ մը։ Երեկոյի աւարտին ներկաները մեկնեցան մեծ գոհունակութեան և հպարտութեան զգացումներով, անգամ մը ևս հաստատելով մեր ժողովուրդի անկորնչելի ձգտումը հասնելու համար իր արդար նպատակին՝ Ազատ, Անկախ և Միացեալ Հայաստանին։

—Զուարթ Ստեփանեան

  • Facebook

  • Our Monthly Newsletter

    Yeritasard Newsletter

  • Mailing List

  • Donate

  • —————————————————————-

    Get involved - click here